"La pena abierta" llega al so final, dempués de dos años creando naturalidá y desnudez nos sos direutos con un austeru acompañamientu acústicu, la xira de la tinetense ciérrase como nun podía ser d'otra manera en Tinéu. Pa la ocasión, van ser varies les apariciones d'artistes convidaos que nun quieren perdese esti momentu únicu pa la música asturiana.
La pena abierta... falamos de diez creaciones, cuasi toes de temática sentimental, vistes dende'l prisma de la decepción o la derrota ("La pena abierta", vuelta de tuerca al mitu de Penélope y Ulises), la resignación dignificada ("Antes d'empezar", lletra de Laura Fernández) o la resignación, cenciellamente, aceptada y hasta esperanzada. ("La vida que te falta", primera lletra escrita a medies por Pablo Texón y Alfredo González).
Aparte de los citaos, nesti discu estrénase escribiendo n'asturianu Javier Vallina con dos cortes totalmente identificables col so estilu habitual ("Son demasiaes les coses qu'hai qu'aprender" y "Les palabres"), d'estructura simple pero sentíu y ellaboración complexes, nos que tamién nos ufierta'l so llabor como coproductor.
Pa finar la nómina de collaboraores, no que cinca a les lletres, tenemos a dos nomes ilustres de la lliteratura y les lletres asturianes: Berta Piñán, de la qu' Alfredo González adapta dos poemes ("Papel en blanco" y "Salvemos") y Boni Pérez, perconocíu lletrista de Los Locos y de Felpeyu, que vuelve a la escena con una lletra parida -y musicada- como ranchera, quiciás la primera en llingua asturiana.
"La pena abierta" son, en conclusión, 10 canciones trabayaes adulces, 10 maneres de cantar a la vida, caduna al so mou.
Les entraes yá a la venta en entradium.com y na Llibrería Asturias de Tinéu.
ANTICIPADA: 6 EUROS
TAQUILLA: 8 EUROS
